Reflexión Marco Persoal - Mód.2 (individual)

 Marco Persoal

A orientación laboral xorde desde tempos remotos, pero é no S.XX cando se inicia a labor do orientador, xorde dunha maneira direccional por parte do orientador.

Na actualidade o que pretende a orientación é:

• Promover cambios, favorecer o desenvolvemento competencial.
• Preparar para a situación de desemprego.
• Orientar na toma de decisións, entre outras funcións.

Comézase a falar de Orientación 2.0, co uso da Web 2.0, denominada tamén social.

Fálase non de TIC senón de TAC ( Tecnoloxías da aprendizaxe e do coñecemento).

Os profesionais empezamos a utilizar as ferramentas Web 2.0 para realizar o noso traballo, pero falta moita formación aínda neste eido.

A Internet ten enormes beneficios na orientación laboral, entre as recomendacións de algúns expertos está o de coñecer e dominar as ferramentas Web 2.0, crear un blogue propio e explorar no ámbito laboral.

O perfil persoal do orientador laboral terá que cumprir cunha serie de competencias:

• Habilidades sociais e persoais para comunicarse. coñecemento amplo da xurisprudencia sobre emprego. dominar metodoloxías didácticas.
•  Traballo cooperativo entre profesionais do mesmo sector.
•  Dominar técnicas de psicoloxía. ter capacidade de axustar a realidade da persoa usuaria o seu entorno sociolaboral. saber axudalo, sen dirixir a súa traxectoria só colaborando no proceso de toma de decisións.
• Debe coñecer a oferta de emprego, facer prospeccións de emprego e planificar en base os datos extraidos. 
• É fundamental estar actualizado, manexar as ferramentas tecnolóxicas. coñecer os elementos básicos de un programa de inserción laboral.

Vimos as claves para fixar un bo proceso de comunicación:

• Clarificar obxectivos.
• Acoller (acompañar o contacto visual e reforzalo con expresións positivas), preguntar (non dar nada por suposto)
• Escoitar activamente, empatizar, reforzar, sintetizar e retroalimentación ou feedback. Moitas e importantes etiquetas.

En resumo debemos contar con:

• Habilidades sociais
• Intelixencia emocional ( empatía, asertividade)
• Reforzamento ( adestrar para que a persoa chegue a un obxectivo e buscar alternativas si é o caso).
• Traballo en equipo
• Resolución de conflitos
• Uso das tecnoloxías, razoable e axeitado.

A Web 2.0 ou web social é unha " denominación de orixe" que se refire a unha segunda xeración na historia de sitios web. O seu denominador común está baseado no modelo dunha comunidade de usuarios.

 Abarca unha importante variedade de redes sociais, blogues, wikis, e servizos multimedia interconectados cuxo propósito é o de intercambiar de forma áxil a información entre os usuarios e a colaboración na produción de contidos.

Trátase pois, de mellorar o entorno de aprendizaxe e poñelos en práctica a través de ferramentas da Web.

Crear contidos ou engadir, reflexionar,organizar e publicar.

Estamos aprendendo a mellorar os usos das TIC para sacar o máximo proveito delas e podelas aplicar a nosa profesión.

Aprendemos unha palabra clave na recollida de información que é a curación de contidos, aprendimos o seu significado.

O orientador laboral debe ser curador de contidos para evitar a infoxicación.

Vimos ferramentas moi prácticas, as cales, o seu uso, fan que sexa unha maneira moi intelixente de traballar, mellorando a produtividade e o esforzo e incrementando o tempo dispoñible para outras tarefas.


O seu uso debe ser transmitido os nosos orientados para que na súa búsquea de emprego ou mellora poidan e deban utilizar de cara o que xa comeza a chamarse traballador so século XXI, " traballador 2.0" e eu sumaría o de emprendedor 2.0

CURACIÓN DE CONTIDOS

O contido  da rede crece dunha maneira imparable e incontrolable fomentando así  a sobrecarga informativa, tamén coñecido como INFOXICACIÓN.  Esta infoxificación o sufren moitos profesionais, onde se ven sobrecargados e colapsados de información que logo non son capaces de catalogar.

A curación de contidos, polo tanto, enténdese como esa acción de encontrar, organizar, filtrar e dotar de valor e relevancia e incluso de utilidade ó contido procedente de diferentes fontes sobre algún tema en concreto. Con outras palabras, podemos dicir que se refire a todo acto de recabar e selecccionar información relevante sobre un tema en concreto e logo ubicala nun espacio visible na web, para que todos aqueles interesados poidan vela e facer uso dela. É por tanto, bastante subxectiva, xa que depende do punto de vista do “curador”.

Dende o meu parecer, a curación de contidos aporta diversos beneficios, tales como:

•           Aporta innovación e competividade ó profesional
•            Formacion e o autoaprendizaxe
•      Dispor dunha gran fonte de inspiración para crear os teus propios contidos
•         Consigues formar parte dunha comunidade

O CURADOR será aquela persoa ou empresa dedicada a navegar na rede en busca de contidos agrupandoos e seleccionaondos e o máis axeitado  para compartir posteriormente nunha comunidade. Esta figura ven sendo un crítico  ou especialista en contidos. Hai que intentar, como curadores de contidos, non cair na tentación de copiar tal cal nos chega a información filtrada, senón que hai que intentar adaptala o máis posible a nosa comunidade  dándolle un valor adicional, como por exemplo con comentarios ou facendo unha boa selección de filtrado. Hai que saber filtrar ben a información para pasala ós nosos usuarios!!

Estamos rodeados por un entorno dixital no que se xera cada vez máis información, onde o curador de contidos de ser capaz de diseñar un proceso que lle permita:       ü        Identificar as mellores fontes de información sobre un tema determinado.

ü        Establecer un mecanismo útil de recuperación de información.

ü        Filtar o contido máis relevante.

ü        Reelaborar e enriquecer o contido filtrado cando sexa necesario.

ü        Difundir o resultado final polos cauces máis apropiados

 

A figura do orientador laboral debe saber o procedemento de saber filtrar, agrupar e compatir toda a informacións relacionandas co ámbito de traballo e saber con que información quedarse (a máis completa, mellor e a que máis pode interesar os nosos usuarios).

Carlos nos comentou que dispomos na rede dunha serie de ferramentas online que nos axudan na labor de curación de contidos, tales como o scoop.it e o feedly.

En canto o feedly decir que é un lector de RSS que nos permite organizar e ordear tódolos contidos, a parte de acceder rápidamente a tódalas noticias que son do noso interese. Ferramenta moi útil, xa que nos axuda aforrar tempo e non ter que revisar unha a unha tódalas fontes de noticias. As categorias que escollín foron as seguintes: traballo social, blogs RRHH, Diario ofiacial de Galicia, discapacidade,emprego, periódicos e seguridade social.

O soop.it permite reunir páxinas web ou artículos baixo un mesmo formato a modo de períodico. Empreguei o Scoop.it para crear un tópico sobre emprego. Dentro deste tópico insertei enlaces e articulos relevantes para o tema.

Vídeo sobre Scoop.it

Scoopi.it - búsqueda de emprego

Ambas ferramentas de curación de contidos me resultaron prácticas e aproveitosas, tanto a nivel persoal como profesional, xa que con ambas podo organizar e xestionar os meus contidos de interese, alonxándome da infoxicación.

A "CURACIÓN DE CONTIDOS": NOVO CONCEPTO.

A curación de contidos. O qué?

Esta si que é una nova palabra para min (neste ámbito): “curación”. De primeiras sóame a curador, a “curandeiro”. Quizais o termo teña algo diso …

Un “curador de contidos”, segundo vimos na exposición de Carlos é “un intermediario crítico do coñecemento que busca, atopa, agrupa e comparte o mellor e máis relevante contido (na rede) sobre un tema especifico. Por tanto, o curador de contidos é un especialista na materia que ademais de atopar contido relevante, achega valor engadindo o seu punto de vista.”

Coa morea de información que podemos atopar cunha simple busca en Google acerca de calquera tema, é fundamental na nosa labor coma orientadores, a filtraxe dos contidos máis relevantes para o noso traballo. É dicir, determinar o que é importante e evitar a “infoxicación”, outra desas novas palabras que aparecen ligadas á expansión das novas tecnoloxía da información, aínda que non ten a exclusiva: trátase da saturación ou “intoxicación” por exceso de información; o desbordamento por non poder procesar toda a información que recibimos.

É aí onde aparece a necesidade da curación de contidos e das ferramentas que nos facilitan esa curación.

O proceso de curación de contidos podemos dividilo en tres fases:

       -  A filtraxe: cribar a información sobre un tema en concreto

       - A agregación: recompilar e presentar a información sobre o tema que previamente filtramos

       - A curación: manter, conservar e engadir valor a información.

A todo o proceso no seu conxunto é o que denominamos “curación de contidos”.

É tal a importancia que colleu esta función, que xa existe coma un novo perfil profesional o de “curador de contidos”.

As ferramentas.

Nas funcións do orientador laboral é preciso manexar moita información de diverso tipo: lexislación, convocatorias, estudos, estatísticas, novas de prensa, boletíns … e de diversas temáticas.

Para poder xestionar esa información de xeito eficaz e operativo, debemos:

       - Seleccionar coidadosamente as nosas fontes de información

       - Filtrar a información que nos poda resultar de proveito para nos e para as persoas que       atendemos

       - Engadirlle valor: aportar, compartir, etc.

Pero esta tarefa é inabarcable sen o uso de determinadas ferramentas. Ferramentas para filtrar e curar contidos.

Estamos a falar de: RSS, Feedly, Scoop-it, Diigo, Storify…

Non é que precisemos utilizalas todas. Cada un de nos sentirase máis cómodo ou sacaralle máis proveito a unhas ou a outras. Pero cada unha desas ferramentas, coas súas propias funcionalidades, axudaranos no noso traballo, facendo que a información que nos interesa chegue a nos sen ir “ buscala”, filtrándoa, preparándoa.

Eu mesmo: ata o de agora, antes de comezar este curso, tiña unha serie de mecanismos que ó chegar ó posto de traballo, repetíanse de xeito cotiá: consulta de determinadas fontes, boletíns, webs de diversos ámbitos, prensa, correo electrónico (moitas veces máis dunha conta), redes sociais, etc.

Cómo podemos racionalizar esas tarefas para non “infoxicar”?

Dende e meu punto de vista particular, hai dúas “regras” que nos poden facilitar moito ese traballo, optimizando os resultados e aforrando tempo:

- Ser selectivos coas fontes de información.
- Utilizar a “caixa de ferramentas” tecnolóxicas que nos resulten máis operativas e cómodas para a tarefa de recoller, filtrar e “curar” a información útil.

Porque, como dixen antes, non temos que usar todo o que “se nos poña por diante”, pero si unha combinación axeitada para cada un de nos en función do noso traballo, da información necesaria, das nosas capacidades...e por suposto, das nosas preferencias.

No meu caso, estou nunha fase de transición, na que veño utilizando as ferramentas que xa coñezo dende hai tempo, e á vez, comezo a probar e incorporar algunhas das novas que estamos a aprender. Isto tentareino reflectir no meu PLE; pero xa será outra historia.

Como mostra dunha das novas ferramentas incorporada ó meu “catálogo”, aquí deixo unha captura do meu Feedly.

Como vedes, teño cinco categorías: boletíns (Doga e Boe), Orientación e Emprego, Formación e Novas Tecnoloxías, Tecnoloxía e Prensa. E isto é so o comezo…

Tamén ando iniciándome co Scoop-it. Déixovos o enlace, pero tede en conta que está "en probas": http://www.scoop.it/t/orientacion-laboral-by-pablo-bello

Por último, quería comentar algo que para min é fundamental no momento actual na utilización das ferramentas e a información: a mobilidade. É dicir, a posibilidade de usalas en calquera sitio e momento a través dos dispositivos “portables”: móbiles, tabletas, etc. Ter “o mesmo” en calquera dispositivo, en calquera momento e sincronizado, ofrece unha enorme flexibilidade para a consulta e o traballo con cada unha delas.

Seguirei investigando. Merece a pena.

Pablo Bello

Creación dun panel en Feedly para uso profesional e dun tópico en Sccop.it- Curación de Contidos

Despois dun par de meses no CEOL 2014 e tendo claro que un dos obxetivos principais do curso é o manexo das TIC,S emparellada á ocupación de Orientador Laboral, estaba a sufrir un empacho con tanta ferramenta nova para aprender, practicar e despois transmitir ós usuarios ( Twiter,Blogger About.me,Google +, Feddly, Scooop.it,....), porque primeiro hai que probar en propia carne o que queremos difundir e compartir.

Sempre me considerei, rastreadora intensa de búsqueda de recursos ,para poñer á disposición dos demais, e usaba a subscrición co enderezo electrónico dalgunhas páxinas web para que me chegara a información; Pero, nos últimos tempos convertírase nunha aventura na que me vía embarcada as 24 horas do día, conectada permanentemente, eu que ata fai catro días tiña por móvil  un ladrillo (sen conexión á internet,sin Whassap....) casi un da época dos picapedra .
Chegábanme  datos de tódolos lados: no meu facebook persoal mezclábase todo o profesional, o móbil cheo de fotos recollidas da prensa con noticias e ofertas de emprego para difundir e compartir, o hotmail persoal cheo de información profesional, ......... estaba empachada , todo o verán na praia permanentemente conectada, porque na oficina non daba tempo a facer a búsqueda intensa de información!Nunca mellor dito " afogada nun mar de datos"!, para procesar e transmitir..........e de repente iniciaba setembro nun curso no que xa non me daban as horas, tiña que tomar decisións porque as horas que adicaba polas tardes á búsqueda de recursos  para difundir é transmitir ós meus usuarios tiña que adicalas ó curso.
Os meus compañeiros daban consellos: ! Non atendas mais xente sin cita!, ! Non gastes tanto tempo en atendelos!!non subas tantas cousas ó facebook do Concello", facebook que xestiono e que podedes ver pinchando aquí mesmo ! Non queiras chegar a todo!!Non gastes mais do teu tempo persoal que non cho agradecen!........... descubríno da man de Carlos a enfermidade que sufría, chamábase "Infotoxicación, estaba sobrecargada de información, mellor dito !Dominada polos contidos da Internet! .

Pero ó mesmo tempo que nos facía fincapé neste novo concepto que a maioría de nos descoñecíamos, tamén nos daba o xarope para a sanación !, palabra máxica" A curación de Contidos!.

(Resumido por Carlos: "Sistemas que traballen por nós e para nós"(non daba crédito ó que oía!), eu que rápidamente busquei na rede que significaba ese novo concepto e que sufrían a maioría dos profesionales do coñecemento , unha enfermidade da sociedade dixital do Século  XXI).

Nos presenta  o Proceso da curación de contidos:

Un proceso que xa facíamos tódolos días e non lle tiñamos nome, que consite en Buscar información, filtrala ,añadirlle valor e difundila ......, pero  a través da ferramenta  RSS  , eso  era !aquel icono que vía tantas veces e non lle tiña nome .

Para poder organizar e xestionar os  lectores rss nos presentou os mais detacados :  Feedly e Scoop it.

Feedly: Nos permite organizar e clasificar por categorías as nosas subscricións segundo os nosos intereses; Debemos entrar nas páxinas e buscar a icona lector rss   como é marcar as nosas preferencias, añadimos feedly  e podemos engadila nunha das categorías xa creadas ou nunha nova como se fose  unha biblioteca, no meu caso as categorías son varias: Normativa, Emprego, Formación, Sepe, Pensa, Sincicatos,  ....... como se pode ver na imaxe, e a partires de ahí o sistema nos notifica automáticamente das modificacións que se produciron nesa web, polo que vamos a ver os titulares das novidades; o que nos interesa podemos deixalo para ler para mais tarde, gardalo, compartilo a través da redes e por suposto eliminar o que nos interesa, a miña valoración e as miñas expectativas desta ferramenta son moi elevadas iso que está en proceso de elaboración porque me vai aforrar unha chea de tempo, inda que algunhas webs non teñen rss .

A continuación unha captura do meu feedly.

Scoop it: É unha ferramenta mais de curación de contidos , que nos permite agregar publicacións web de temas que nos interesa.
Se crea a partir de un tópico"título do noso periódico",agréganse palabras chave separadas por comas, para que posteriormente a ferramenta nos amosa unha serie de artigos que nos poden intresar e agregar ó noso Scoop.it, tamén podemos directamente dende  a ferramenta pero a min foime mais doado facelo no buscador , localizalo e engadilo; Podemos añadir valor e compartilo nas redes.

Este é o meu http://www.scoop.it/t/orienta-salnes


A verdade é que estamos aprendendo a manexar unha morea de ferramentas moi prácticas para nosa tarefa diaria de Orietnadores, tódalas profesións cambian e debemos adaptarnos " Reciclarse o morir".


Avelina Dios Romay

A Web 2.0 para a Orientación Laboral. Reflexión grupal.

 

 

Dende o inicio do curso fómonos metendo de cheo nun mundo virtual que non deixa de ser virtual, e que o que máis nos soaba era o de “competencias dixitais” nalgúns casos; neste caso imos facer una valoración de “A Web 2.0 para a Orientación Laboral” levada a cabo o 20 de setembro de xeito presencial.

 

Algo xa coñecíamos, os mails, algo de  Google+, o Facebook, oíamos falar de Twitter que sobre todo o usaban os máis novos e o Whatsapp…, sabíamos que había algo máis pero non todo o que estamos descubrindo. 
  

O primeiro do relatorio xa foron os famosos “chíos”, que daquel paxariño,…a biodiversidade… mundial, real, pero tamén virtual de que podemos seguir, ver e comentar moitas cousas aplicadas ao terreo profesional.

As novas “palabras”, lembrádevos do noso  hashtag   #Orientacióng e non debeu de quedar claro cando fai días, aínda nolo repetía...

 

SITUACIÓN:

Comezou expoñendo Carlos  a situación na que nos atopamos, o mundo no que nos movemos, e como comercial, que tiñamos que crear:

1º.- “Un perfil de talento” - que tiñamos que amosar o noso talento, a nosa traxectoria, e as nosas expectativas dun modo innovador; que unha imaxe vale máis que mil palabras e nos larga de cheo un exemplo dunha  gravación dun Videocurrículum…(Yovijob, ferramenta para videocurrículum) -pero si fai días non queríamos nin subir a foto…-, faite visible, marca a diferencia…e a continuación:

2º.-  Únete a grupos, agrégate a comunidades, date a coñecer…pero si as únicas que coñezo son as comunidades de edificios e non quero que me coñezan,  e ademais cada vez que vamos ás reunións só hai pagos... Polo visto, nas comunidades virtuais obtés beneficios…

3º.- Apps móbiles - coñecer todo o que hai dispoñible dende o móbil, para non deixar escapar oportunidades de emprego: pero si é o móbil o que me persegue, se me indica onde estou a cada momento, e me pregunta continuamente ¿Vive usted en…? ¿Trabaja usted en…?; este verán ata me dicía: “de la playa a su casa le lleva siete minutos”.

4º.- Información oficial - manexar portais oficiais do SPEG, SEPE…..en algo estamos dacordo.

5º.- Información experta - un montón de manuais e blogs, con consellos para todo o mundo e obter un gran éxito: todo o mundo sabemos dar consellos o problema é aplicalos a un mesmo.

Polo tanto, os ORIENTADORES/AS, que temos  que saber “de todo”, debemos poñer orde e manexar novas canles de busca, medios e soportes, medios de relación profesional, novos comportamentos, novos medios de relación profesional, novas ocupacións de perfís e novos recursos na Rede. Pero si todo é novo!. Algúns estarían encantados de estar continuamente con todo novo, indo á moda: ”Tés todo novo para estrear neste outono no Corte Inglés!”.

Ó mesmo tempo de manexar todo, porque somos moi controladores, temos que preocuparnos de desenvolver a nosa propia competencia dixital, elaborar o noso propio blog, crear e construír relacións interprofesionais, explorar a nosa contorna laboral, aprender constantemente e difundir información e transmitir como experiencia: “Está claro polo que estamos aquí”, pero tamén temos que ter chaves, case mestras (porque temos que ter competencias de todo tipo). Porque imos crear artefactos dixitais. “Todo un arte o de ser Orientador!”.

COMPETENCIAS: Emocionais, Relacionais, Aprender a aprender (encántanos),  Xestionar as tarefas e Dominio  das TIC.

  

Estas TIC (Competencias dixitais) son as que nos traen de cabeza a todos:    creación, información, comunicación interpersoal e social, cultura dixital. A actuación responsable nos contornos dixitais, e ¡como non!: coñecemento e dominio das novas tecnoloxías para poder aplicar e adaptarnos a tódalas posibilidades.

Témolo claro, Internet move o mundo,  temos indicadores TIC de todo tipo que nos darán a situación de España no mundo, os niveis por fogares…(en España: Eurobarómetro, ONTSI, Fundación Telefónica, Internet World Stats; incluso a nivel autonómico: OSIMGA e Axenda Dixital de Galicia).

E chegamos ó gran descubrimento do século no 1990: o famoso concepto  http:// evolucionando ata 2004 co acuñamento da nova xeración, a Web 2.0 (hai quen xa fala de 3.0), cuns beneficios claros:

A web como plataforma, o  aproveitamento da intelixencia colectiva, o sistema "Intel inside", o fin do ciclo das actualizacións de software, modelos de programación lixeiros e as experiencias enriquecedoras do usuario (en Orientación Laboral, si se sabe escoitar podemos aprender moito dos demandantes).

E agora, despois de tanta palla, analizaremos os espazos e ferramentas da Web 2.0 que cremos que teñen unha grande aplicación práctica na orientación tanto a nivel persoal como para transmitir os nosos usuarios: Lectores RSS (Nova palabra: Infoxicación -ter moita  información-), Marcadores Sociais (Folksonomia -etiquetar-) e o que máis nos trae de cabeza neste curso: As Redes Sociais,  que nos permiten  unha conversa directa e un intercambio continuo e actualizado de valiosa información para difundir, como Facebook, Pinterest, Linkedin… , isto medra mais rápido que a escuma (Redes Sociais en España 2012).

Ademáis doutras ferramentas para construción de contidos (Wordpress é o mellor editor de blogs), entre outras e outros para o traballo colaborativo en liña (Drive) , ou o almacenamento na nube (Dropbox, Slideshare), creación gráfica (Canva, Picktochart…) e a palabra nova de "curación" de contidos (Storify, Scoopt it…)

En conclusión, debemos intentar utilizar todas estas novas ferramentas para o emprego, transmitir unha nova “mentalidade” (adoptar unha nova postura activa), nova “filosofía” (a “rede” supón un valor clave), e usar esas novas “ferramentas”  que nos axudan a diferenciarnos  a través de, por exemplo: infografías, cartóns de visita dixitais..., saber cómo funcionan as novas aplicacións nas entrevistas de traballo (Skype), ou Vídeo-Currículum.

Aplicar tódalas ferramentas posibles para crear unha Identidade Dixital, Virtual (ata o de agora so coñecíamos o carné de identidade de toda a vida) que proxecta en internet a traxectoria persoal e profesional dunha persoa, e que debemos intentar coidar ó máximo posible  porque hai partes da nosa identidade virtual que  se crea con ou sen a nosa participación e que non podemos controlar; así que coidade a identidade dixital, na Rede todo deixa pegada, aínda que agora a reputación on-line pode suprimirse (Sentencia do Tribunal da UE "Dereito ó olvido en Internet"); iso é como o dito de “Todo se sabe “ e na rede “Lo que se  hace en las Vegas, no se queda en Las Vegas”, polo tanto OS ORIENTADORES TEMOS QUE SABER DE TODO E MÁIS, E SE VOS FIXASTES AO LONGO DO ARTIGO, TODO É NOVO, NOVA, NOVOS, NOVAS… HAI QUE APRENDER  A APRENDER PARA DESPOIS SABER DIFUNDIR E COMPARTIR.

Aquí podedes visualizar o noso storify da sesión:

Grupo INNOVA